Dominique Crenn

Crenn Frantzian hazi zen eta amak sukaldaritzaren oinarriak irakatsi zizkion bertan, baina ibilbide profesionala San Frantziskon abiatu zuen 90eko hamarkadaren hasieran. Jeremiah Tower-en eskutik prestakuntza jaso ondoren, hiriko sukalde garrantzitsuetan zehar ibili zen, eta Yakartako Intercontinental hotelean sukaldari exekutiboa izan zen. 2011n, San Frantziskora itzulita, jatetxe propioa irekitzeko gai izan zen, Atelier Crenn, eta urtebetera bi Michelin izar lortu zituen. Haren proposamenak, sormena, arriskua eta sentiberatasuna nahastuz, liluratu egiten du bazkaltiarra, kartan platerak aurkezteko erabiltzen dituen mikropoemetatik hasita. 2016an, The World’s 50 Best Restaurants zerrendak ematen duen Best Female Chef saria irabazi zuen.