Ohiko galderak

  1. Orokorrak

    Zer da Basque Culinary World Prize saria?
    Basque Culinary World Prize (BCWP) nazioarteko sari bat da, ekimen eraldatzaileak dituzten sukaldariburuak saritzeko sortua. Basque Culinary Centerrek (BCC) eta Eusko Jaurlaritzak sustatu dute 2016tik, gastronomiak aldaketa-eragile gisa zer-nolako indarra duen nabarmentzearren.

    Nazioarteko sukaldariburuen belaunaldi batek bere lanbidearen dimentsioa zabaldu egin zezakeela ulertu zuen, elkartrukeak aberastutako esparru batean sentsibilitateak eta gaitasunak txertatuz; eta, oso bereziki, gizartearekin batera sukaldaritzatik harago ekarpenak egin zitzakeela ulertu zuen. Ekimenak bilakaera hori aitortzen du.

    BCWPk sukaldaritza gizartean eragiteko baliatzea erabaki duten gizonen eta emakumeen lana nabarmentzen du. Arlo hauetako proiektuetan esku hartzen dute (sukaldaritza-berrikuntza, osasuna, nutrizioa, hezkuntza, ingurumena zein garapen soziala, besteak beste), edota, oro har, elikagaigintzan eragin positiboa duten ekintzak gauzatzen dituzte.

    Saria 100.000 eurokoa da. Gastronomiaren eragin biderkatzaile eta eraldatzailea erakusten duen proiektu batera bideratu behar dute diru hori.

    Nazionalitate guztietako sukaldariburuak proposatu daitezke sarirakowww.basqueculinaryworldprize.com webgunearen bitartez. Gremio gastronomikoko profesional orok du proposamenak egiteko aukera

    Zer da ekimen eraldatzaileak dituen sukaldariburu bat?
    Eraldaketaz hitz egiten dugunean, aldaketaz ari gara. Horrenbestez, Basque Culinary World Prizek izaera eraldatzailea duten pertsonak ezagutu nahi ditu. Pertsona horien lanak aldaketa garrantzitsuak ekarri behar ditu honako arlo hauetan, besteak beste: hezkuntza, osasuna, nutrizioa, ingurumena, teknologia, berrikuntza, ekintzailetza, industria, garapen soziala edo ekonomikoa.
    Zer ez da Basque Culinary World Prize saria?
    Karitatezko proiektuak edo proiektu sozial hutsak dituzten sukaldariburuentzako sari bat bakarrik. Garapen, berrikuntza, ikerketa eta sormenaren alde ere egiten dugu. Azken batean, sukaldari batek eragin dezakeen eraldaketa ez da ongintzaren esparrura edota alderdi sozial hutsera mugatzen. Fenomeno zabala, askotarikoa eta biderkatzailea dela ulertzen dugu.
    Zein da sariaren denbora-lerroa?
    Proposamenak jasotzeko prozesua zabalik egongo da 2018ko maiatzaren 31ra arte. Lehenik, gastronomiako akademiko eta adituz osatutako Batzorde Tekniko batek aztertuko ditu hautagaitzak. Sarirako 10 finalisten izenak uztailaren 2an iragarriko ditu batzordeak. Ondoren, Basque Culinary Centerreko Aholku Batzordearen urteko bileran, epaimahaikideek eztabaidatu eta irabazlea hautatuko dute (gehiengo bidez). Uztailaren 24an jakinaraziko dute irabazlea zein den. BCWP saria emateko ekitaldia urriaren 25an egingo da Euskal Herrian.
    Nork sustatzen du saria?
    Basque Culinary Centerrek (BCC) eta Eusko Jaurlaritzak ematen dute saria. BCC 2011n sortu zen munduko itzal handieneko sukaldari batzuek babestuta gastronomiaren arloko hezkuntza, ikerketa eta berrikuntza sustatzearren. Era horretan, gaur egun sukaldaritza dena are sakonago uler dadin bultzatzen du, eta gogoeta eragin nahi du sukaldarien gaur egungo rolaz eta gastronomia gizartea eraldatzeko balia daitekeen moduaz.

    Eusko Jaurlaritzak, berriz, saria Euskadi-Basque Country estrategiaren barnean sustatzen du. Herrialde-marka horren babesle eta partaide dira euskal erakunde guztiak, Euskadiren irudi hau bultzatzeko: lan gogorrean, konpromisoan, hobetzeko grinan, eraldaketarako joeran edota emakumeen eta gizonen arteko aukera-berdintasunean oinarritutako kultura.

    Urtero deitzen al da saria?
    Jarraian deitu den hirugarren urtea da. Edizio bakoitza amaituta kronograma berri bat ebaluatuko da.
    Nork finantzatzen du saria?
    Saria ekimen publiko-pribatua da.

    Proposatzeko prozesua

    Nola proposatzen da sukaldari bat?
    Hautagaiakwww.basqueculinaryworldprize.com webgunean eskura daitekeen inprimakia betez proposatzen dira.
    Nork proposatu ditzake?
    Gastronomiaren arloko profesional orok. Komunitate gastronomikoa indarra eta ahotsa dituen kolektibo gisa ezagutzea ezinbestekoa da ekimen eraldatzaileak dituzten pertsonaiak aurkitzeko, jendaurrean agian ezezagunak direlako. Horregatik, gremioa parte hartzera animatzen dugu, hautagaiak proposatzeko.
    Zer profil hartu behar da kontuan hautagai bat proposatzeko orduan?
    Sukaldariburu bat proiektu espezifikoetan egindako lanagatik zein ingurunearen alde gauzatutako ekintzengatik proposatu daiteke. Pertsona eraldatzaileak bilatzen ditugu, alegia, honako arlo hauetan aldaketak eragin ditzaketen sukaldariak: hezkuntza, osasuna, nutrizioa, ingurumena, teknologia, berrikuntza, ekintzailetza, industria eta garapen sozial edo ekonomikoa.
    Proposatu al dezake sukaldari batek bere burua sarirako?
    Ez, gastronomiaren arloko profesional aktiboek eta sektoreko erakundeek proposatu behar dituzte hautagaiak.
    Berriz ere proposatu ditzakete aurten 2017an proposatutako sukaldariak, baita iazko finalisten artean egon baziren ere?
    Bai, bereziki hautagai horren lanak eragindako aurrerapenak direla-eta berriz ere aintzat hartzea merezi badu. Basque Culinary World Prize sariaren aurreko irabazleak dira salbuespen bakarra, pertsona berak ezin baitu saria bi aldiz irabazi.
    Zer egiten da proposatutako pertsonen informazioarekin?
    Babesten da. BCWPk ez du jakinaraziko proposamena nork egiten duen. Era horretan ezin izango zaie eragin ez Batzorde Teknikoari, ezta epaimahaikideei ere: sukaldariei buruzko informazioa jasotzen dute, sariaren idazkaritzak balidatu eta prozesatuta, nork nor proposatzen duen zehaztu gabe.
    Proposatu al dezake hautagai bat baino gehiago pertsona batek?
    Bai, pertsona batek nahi adina hautagai proposatu dezake.
    Sukalde batean lanean egon behar dira hautagaiak gaur egun?
    Ez nahitaez. Sukaldaritzako esperientzia eduki behar dute, ordea.
    Sukaldariburu kualifikatuak izan behar dira hautagaiak?
    Ez dago xedatuta sukaldariburuek berariazko kualifikazio akademikorik eduki behar dutenik, baina sukaldari gisako ezagutza profesionala eduki behar dute.
    Nola egiaztatuko da proposatutako sukaldariburuei buruz emandako informazioa zehatza dela?
    BCWPren idazkaritzak proposamenetan emandako informazioa balidatuko du. Ikertu ondoren, hautagai bakoitza banan-banan baloratzeko behar den informazio guztia barne hartzen duen txosten zehatza egingo du. Lehenik Batzorde Teknikoak baloratuko ditu (10 finalistak erabakitzeko), eta Epaimahaiak gero.
    Egin al dezakete proposamenik BCCko kideek, haren patronatukoek, Nazioarteko Batzordekoek zein BCWPren Batzorde Tekniko edo Epaimahaiko kideek?
    Ez.
    Nola erabakiko da saria? Izango al dute garrantzi handiagoa balorazio-irizpide batzuek beste batzuek baino; bikaintasun gastronomikoak edo erantzukizun sozialak, esaterako?
    Irabazleak, bere ekintzen bitartez, gastronomiaren ahalmen eraldatzailea adierazi behar du, honako arlo hauetako proiektuen bitartez: sukaldaritza-berrikuntza, osasuna, nutrizioa, hezkuntza, ingurumena zein garapen soziala, besteak beste, edota, oro har, elikagaigintzan eragin positiboa duten ekintzen bitartez. Epaimahaikideek eztabaidatuko dute BCWPren mezua hoberen ordezkatzen duena aurkitu arte.
    Izan daitezke hautagai BCCko kideak, haren patronatukoak, Nazioarteko Batzordekoak zein Batzorde Tekniko edo Epaimahaiko kideak?
    Ez.
    Kontuan hartuko al da hautagaiek jasotzen dituzten proposamenak Epaimahaiko hamar sukaldariburuak erabakitzeko orduan?
    Ez, irabazle izan daitezkeenen izenak biltzea da proposatzeko prozesuaren helburua. Sariaren Batzorde Teknikoak berdin jokatuko du proposamen bat edo hamaika proposamen jasotzen dituzten pertsonekin.

    Epaimahaiari buruz

    Nork osatzen dute Batzorde Teknikoa 2018an?
    Xavier Medina, Gizarte Antropologiako doktorea eta Food, Culture and Development UNESCO katedrako zuzendaria; Jorge Ruiz Carrascal, Elikagaien Zientziaren Saileko katedraduna Kopenhageko Unibertsitatean, Danimarkan, eta Pia Sörensen, Harvardeko Unibertsitateko Zientzia eta Sukaldaritza programaren arduraduna.
    Nor dira epaimahaikideak 2018an?
    Basque Culinary World Prize saria emango duen epaimahaiburua Joan Roca izango da, eta BCCren Nazioarteko Kontseiluko beste kide batzuez lagunduta egongo da. Honako hauez, besteak beste: Gastón Acurio (Peru), Massimo Bottura (Italia), Dominique Crenn (AEB), Yoshihiro Narisawa (Japonia) eta Enrique Olvera (Mexiko). Horiekin batera arituko dira II: Basque Culinary World Prize sariaren irabazlea eta beste diziplina batzuetako erreferentziazko adituak, hala nola Ruth Reichl, argitaratzailea eta behinola The New York Times egunkariko kritika gastronomikoaren arduraduna.
    Nola hartuko du erabakia Epaimahaiak?
    Sariaren epaimahaikideek finalisten zerrendakoen artetik bozkatuko dute irabazlea, Basque Culinary Centerren Nazioarteko Kontseiluaren urteko bileraren barruan eginiko batzar itxian. Diziplinarteko ikuspegitik, hautagaien profila baloratuko dute zer-nolako ospea duten alde batera utzita; hala bada, haien lana, proiektuen garrantzia, izandako eragina eta zer testuingurutan egin duten baloratuko dute.
    Zer kualifikazio dute sukaldari horiek sariaren irabazlea erabakitzeko?
    Basque Culinary Center-eko Nazioarteko Kontseiluak ezerk baino hobeto erakusten du gastronomia indar eraldatzailea izan daitekeela. Haren kideak sariaren izaeraren isla ezin hobea dira, sukaldaritza ulertzeko beste era bat bultzatzeko gauza izan dira eta. Horregatik, ezin egokiagoak dira beste arlo batzuetako adituak ere barne hartzen dituen Epaimahaia osatzeko, irabazlea diziplinarteko ikuspegi batetik hautatu dezaten.
    Epaimahaikide batek sukaldariburu finalista horietako bat ezagutzen badu edo, are gehiago, finalistaren batekin lan egiten badu, eragingo al dio horrek erabakiari?
    Epaimahaikide batek hautagairen batekin lan egiten badu edo haren bazkidea bada, abstentzioa eman beharko du dena delako hautagai hori bozkatzeko txandan.
    Nola bultza daitezke sukaldaritzako trebeziagatik horren ezagunak ez diren sukaldariburuen edo herrialdeen proposamenak
    Gastronomiaren alorrean zuzenean esku hartzen duen pertsona orok du aukera mundu osoko hautagaiak proposatzeko, Basque Culinary World Prize sariaren webgunearen bitartez. Erakunde akademikoei ere egiten zaie hori egiteko deia. Sare horien bitartez hain ezagunak ez diren sukaldariburuak identifikatzea espero dugu.
     

    Sariari buruz

    Nork irabaz dezake saria?
    Gizarteari eragin positiboa dakarkioten ekimen eraldatzaileak abiarazten dituen sukaldari orok irabaz dezake saria, haren ospe-maila edo jatorria edozein izanik ere. Hautagaiek gastronomiaren esparruko ibilbide profesionala eduki behar dute, eta ekintza zehatzetan esku hartu behar dute. Haien lana, proiektuen garrantzia, izandako eragina eta testuingurua hartuko dira kontuan.
    Egon al daiteke berdinketarik?
    Ez.
    Zer sari jasoko du irabazleak?
    Irabazleak 100.000 euro jasoko ditu aukeratzen duen proiektu eraldatzailera bideratu ditzan, Basque Culinary World Prize sariaren irizpideei jarraikiz betiere.
    Nola bermatuko da 100.000 euro horiek egoki erabiltzen dituztela eta ez xede komertzialetarako?
    Basque Culinary World Prize saria irabazi duela irabazleari jakinarazi ondoren, proposatutako proiektua aztertuko da haren ekarpenak gizartea gastronomiaren bitartez eraldatzeko zer-nolako balioa duen egiaztatzeko. Sukaldariburua lotuta dagoen proiektu bat izan daiteke, jakina, baina ezin dio zuzeneko onura komertzialik ekarri sukaldariburu irabazleari. Zehatz-mehatz dokumentatu beharko da baliabideei ondoren zer erabilera ematen zaien.  Sustatzaileek ekarpena behar bezala erabiltzen dela zainduko dute.
    Basque Culinary World Prize sariak sukaldariburu eraldatzailea bilatzen ditu, aldaketak sortzeko bokazioa duten gizon eta emakumeak, alegia. Sukaldariburu langile eta ekintzaileen lana nabarmendu nahi dugu, bikaintasuna bilatzen duten horiena; jende berritzaile eta sortzailearena, nekaezin, iritzi orokorraren kontrako eta ausartegi ere badirenen lana, baina batez ere, ingurunearekin konprometiturik dauden pertsonena. Sukaldaritza gizartean eragiteko erabili nahi dutenen lana nabarmentzen du, proiektu jakin batzuk aurrera eraman dituztenena.