Basque Culinary World Prize

Sari bat ekimen eraldatzaileak dituzten sukaldariburuentzat.
Parte har ezazu sukaldaritza aldaketa-eragile izan daitekeela erakusten duten pertsonaiak proposatuz.

Bideoa ikusi

Basque Culinary World Prize

Sari bat ekimen eraldatzaileak dituzten sukaldariburuentzat

Sukaldariburuen belaunaldi batek sukaldetik kanpo ere eragina izateko ahaleginari heldu zion ingurunearekin are elkarreragin handiagoa lortzearren, eta ordutik aurrera gastronomian lan egiteak beste zerbait esan nahi du. Mundu osoko sukaldariek ulertu zuten beren ezagutzaz, lidergoaz, ekintzaile-senaz zein sormenaz baliatu zitezkeela gizarteari aldaketa eraldatzaileekin laguntzeko.

Basque Culinary World Prize saria bilakaera hori ospatzeko sortu zen: gastronomia aldaketa-eragile baliotsua den fenomeno horren aniztasuna eta zabaltasuna nabarmentzeko. Gastronomia urrutirago eramateko urte askotan lan egin duten sukaldari inspiratzaileek gidatutako mugimenduaren adierazgarri, eta tartean dira Dan Barber, Jamie Oliver, Alice Waters, Jose Andres eta beste iraultzaile batzuk.

Sukaldariburu eraldatzaileen bila ari gara, hau da, edozein nazionalitate edo sukaldaritza-kulturatako gizon nahiz emakumeen bila, besteak beste, honako arlo hauetan eginiko lanengatik nabarmendu direnak: sukaldaritza-berrikuntza, osasuna, hezkuntza, ingurumena, elikagaigintza, garapen sozial edo ekonomikoa.

Covid-19 pandemia bezalako erronka baten aurrean, Basque Culinary World Prizeren logikak ezin ziren berdinak izan. Saria egungo egoeraren parean egon behar zen, eta, beraz, 5. edizioaz baliatu behar zen gastronomiak eragindako sektore gisa duen rola nabarmentzeko, eta baita garai hauek eskatzen duten erantzun globalean inplikatutako sektore gisa azaltzeko ere.

Diziplinarteko epaimahai batek, munduko eragin handieneko sukaldariburuetako batzuek zein nazioarteko akademiko eta adituek osatua, hautatuko du urtero sari global eta paregabe honen izaera hoberen ordezkatzen duena. Basque Culinary Center-ek (BCC) eta Eusko Jaurlaritzak sortu dute, Euskadi-Basque Country Estrategiaren barruan.

2020: IRABAZLE BAT ETA 10 AIPAMEN BEREZI
Pandemiari dagokionez, BCWPk arreta munduko hainbat tokitan eta chefetan jartzea erabaki zuen 2020an gastronomiak egoera berezi honetan nola erantzun dezakeen erakusteko. Horretarako, mezu indartsu, biderkatzaile eta kolektibo bat bidaltzea zen helburu, ez bakarrik irabazle bat esanez, baizik eta 10 aipamen berezi; 10 chef inspiratzaileren lana ospatzeko. Izan ere, guztiok primeran islatzen dute sukaldariek izan dezaketen eragin soziala talentua, sormena eta indarra erabiltzen dituztenean.
Ohiko galderak ikusi
  • otsaila

    19/ Proposamenak egiteko epearen hasiera.

    Gastronomiaren arloko profesionalek hautagaiak proposatzeko epea hasiko da.

    Izendatzeko epea amaitu da.

  • ekaina

    10/ Proposamenak egiteko epearen amaiera.

    Proposamenak idazkaritza teknikoari helaraziko zaizkio, eta hautagaiek sariaren irizpidea betetzen dutela egiaztatu eta haiei buruz ikertuko du.

  • ekaina

    Batzorde Teknikoak hautagaien berri jasoko du.

  • azaroa

    Irabazlea aukeratzea.

  • azaroa

    Saria banatzeko gala.

    Irabazleak Eusko Jaurlaritzako agintarien eskutik jasoko du saria Euskadin antolatutako ekitaldi berezi batean.

Saria

Basque Culinary World Prizek 100 mila euro bideratuko ditu irabazleak aukeratutako proiektu batera, kontuan hartuta proiektu horrek sukaldaritzaren botere eraldatzailea adierazi behar duela.

Saria hezkuntza, berrikuntza eta ikerketa gastronomikoaren arloan munduko liderra den Basque Culinary Centerrek (BEC) eta Eusko Jaurlaritzak ematen dute, Euskadi-Basque Country estrategiaren esparruan. Herrialdearen marka hori, euskal erakunde guztien babesarekin, Euskadi sustatzeaz arduratzen da, bertako balioetan oinarrituta, besteak beste: esfortzuaren kultura, konpromisoa, nork bere burua gainditzeko gaitasuna, eraldaketaren aldeko bokazioa edo gizon eta emakumeen arteko aukera-berdintasuna.

Euskadiko sari honen bidez, eskualde honen izpiritua azpimarratzen da, eta, era berean, aparteko helmuga gastronomikoa dela erakusteko arrazoi berriak ematen ditu. Izan ere, bisitarako eta gozamenerako arrazoi gehiago eta hobeak ematen ditu behin eta berriro.

Basque Culinary World Prize sariak pertsonak saritzen ditu (ez proiektuak), ibilbide eta/edo ekintza nabarmenak egin dituztenak garapenaren, berrikuntzaren, ikerketaren eta sormenaren alde. Ez da karitatezko proiektuak edo proiektu sozial hutsak dituzten chefentzako sari bat. Azken batean, sukaldari batek eragin dezakeen eraldaketa ez da ongintzaren esparrura edota alderdi sozial hutsera mugatzen. Fenomeno zabala, askotarikoa eta biderkatzailea dela ulertzen dugu.

Bestalde, BCWP saria ez da chef ospetsu eta sona handikoentzat bakarrik: helburua ez da hautagairik entzutetsuena edo «handiena» saritzea. Hautagai izendatu guztiak neurri berean hartzen dira aintzat, haien jatorria edo ospe-maila edozein izanik ere. Gakoa da ekimenak zer mailatan erakusten duen gastronomiaren gaitasun eraldatzailea ekintza zehatzen bidez.

BCWP ez da, ezta ere, etorkizuneko proiektuak dituzten chefentzako sari bat: chefek hainbat arlotan egiten duten lan konstantea eta jarraitua nabarmentzea da asmoa; kontuan hartuko dira ekintzen lorpena eta sariak sor dezakeen efektu biderkatzailea.

 

BATZORDE TEKNIKOA 2020

Diziplinarteko adituen talde honek hautagaien profila aztertuko du eta 10 finalistak erabakiko ditu; hartarako, arlo hauetan zer lan egiten duten hartuko dute kontuan: sukaldaritza-berrikuntza, osasuna, nutrizioa, hezkuntza, ingurumena, elikagaigintza eta garapen sozial edo ekonomikoa.

Epaimahaia 2020

BCCren Nazioarteko Kontseiluko kideek erakusten dute sukaldariburuek zer irismen izan dezaketen lanbidearen ohiko mugak gainditzen dituztenean. Horregatik, irabazlea hautatzeaz arduratzen dira nazioarteko aditu nabarmenek lagunduta.

Irabazlea 2020

José Andrés

Jose Andresek, World Central Kitchen (WCK) erakundearen bidez, inoiz ez bezala mobilizatu ditu sukaldaritza munduko profesionalak, eta mobilizazio horretan erabakigarria izan da tokiko lidergoekin batera lankidetzan eta kosorkuntzan jardun izana. WCK-k paper garrantzitsua bete du larrialdi egoera desberdinetan; horietan bat, COVID-19arena. Martxoan pandemia gogor jotzen hasi zenetik, Jose Andresek World Central Kitchen aktibatu zuen, ez bakarrik Estatu Batuetako hirietan, baita Espainian ere. Pandemiak iraun duen bitartean, bistan da erakundea hazi egin dela, eboluzionatuz joan dela eta sukaldarien arteko lankidetzarako gune global bat bilakatu dela. Horrek inoiz ez bezala sendotu du sukaldaritzatik abiatutako kohesioa, dinamizazioa eta laguntzaren antolaketa.

Ameriketako Estatu Batuetan jatetxe kate zabal bat daukan sukaldari asturiar honek dioenez, “sukaldaritzaren sektorean lan egiten dutenek bakarrik lagundu dezakete ekonomia suspertzen, komunitateak berreraikitzen diren bitartean”. WCK duela hamar urte sortu zen, herrialde ugaritan esku hartu du eta mundu guztiko milaka boluntario eta sukaldari mobilizatu ditu.

 

Gainera, chefak urteak daramatza migrazio erreformak eta lan hobekuntzak sustatzen jatetxeen sektorean, sukaldaritza aldaketa sozialaren eragile izan daitekeelakoan.

Irabazlea 2019

Anthony Myint

Irabazlea 2018

Jock Zonfrillo

Irabazlea 2017

Leonor Espinosa

Finalistak

Basque Culinary Center

Erakunde akademiko aitzindaria, sari aitzindari baterako

Basque Culinary Center gastronomiaren arloko hezkuntzan, berrikuntzan eta ikerketan diharduen erakunde akademiko bat da, 2011n Arrasateko Unibertsitatearen laguntzarekin sortua, zazpi euskal sukaldaribururen babesarekin. Haietako batzuk Juan Mari Arzak, Pedro Subijana eta Andoni Luis Aduriz dira.

Lehen mailako heziketa, ikerketa eta berrikuntza dira bikaintasuna lortzera bideratutako eskaintza akademiko baten atal batzuk. BCCren xedea gastronomia-sektoreko erreferentzia bat izatea da, eta gaur egungo sukaldariburuek eragile arduratsu gisa eta beren garai, kultura, gremio eta komunitatearekin konprometituta izan dezaketen eragina azpimarratzea.

Hasieratik, munduan eraginik handiena duten sukaldariburuetako batzuen laguntza jaso du, BCCko Nazioarteko Aholku Batzordean bilduta. Joan Roca (Espainia) da presidentea, eta honako hauek dira gainerako kideak, Gastón Acurio (Perú), Ferran Adrià (Espainia), Alex Atala (Brasil), Dan Barber (AEB), Heston Blumenthal (Ingalaterra), Massimo Bottura (Italia), Michel Bras (Frantzia), Dominique Crenn (AEB), Trine Hahnemann (Danimarka), Yoshihiro Narisawa (Japonia), Enrique Olvera (Mexiko) eta René Redzepi (Danimarka).

BCCk, haiek bezalaxe, sukaldaritza beste diziplina batzuekin lotzeko helburua du, eta ekarpen positiboak egin nahi dizkio gizarteari, ekintza zehatzen bitartez.

Euskadi Basque Country

Halako sari bat Euskadin baino ezin zitekeen sortu, sukaldaritzako aurrerapen handiekin lotuta egon baita historikoki lurralde hori, baita BCWP sariaren helburuak irudikatzen duten berrikuntzarako, sormenerako, konpromisorako eta gizarte-kohesiorako bokazioarekin ere.

Euskadi lurralde pribilegiatua da gastronomiari dagokionez. Gaur egungo sukaldaritzako eragile eta mugimendu erabakigarri asko sortu dira Euskadin. Euskal sukaldaritzak, sustrai sendoak izan arren, tradizioa eta abangoardia bateratzen jakin du, eta joerak markatzen eta munduan inspirazio-iturri izaten. Izan ere, per capita Michelin izar gehien dituen eskualdea da, gaur egun sukaldaritza-eskaintzarik handienetako bat duena.

Euskadik elementu ezin hobeak ditu: itsasoaren, mendiaren eta haran emankorren konbinazio bitxia; topaketarako esparru komunen konfigurazioa; ondo jateko eta ondo edateko gustua; produktu hurbilekiko errespetua; bikaintasunerako orientazioa; bokazio eraldatzailea; eta identitatearen eta sormen, kooperazio eta elkarlanaren artean lortzen duen erlazioa. Itzelezko elementuak dira Basque Culinary World Prize saria sortzeko.

Aurreko edizioak

Ezagut ezazu aurreko edizioak nola izan ziren

Informazio gehiago
Webgune honek cookiak erabiltzen ditu.
Nabigatzen segituz gure cookien politika onartzen duzula ulertuko dugu.